2019 FIFA Best Player Pahra Cazin ah Messi, Ronaldo, Virgil Dijk an Tel Thotho




Ballon d'Or 2019 ca ah minung 10 thim cangmi hna.

Vawleicung bawlungchuih thiam bik (Ballon d’Or 2019) thimnak nicaan a hun naih bang in FIFA zong nih minung 10 a thim chungmi hna cazin a hun langhter.

Atutan FIFA Best Player thimnak hi 16 July 2018 in 19 July 2019 karlak, kum khat chung bawlungchuihtu hna an cawlcangh ning zoh in pek dingmi a si.

Minung paphra thim cangmi hna zong hi atulio vawleicung bawlung tual ah minthang lawngte an si hna.

Cu hna cu: Ronaldo, Messi, Hazard, Mbappe, De Jong, Harry Kane, Sadio Mane, Salah le Virgil Van Dijk hna hi an si.

August 29 zaan ah an tuahmi UEFA Palyer of the Year 2019 ah De Jong nih Laikal thiam bik a co bang in Messi nih Hmaikal thiam bik a co ve cang. Cun, Virgil Van Dijk nih Best Player laksawng a co fawn cang.

Vawleicung minthang Forbe Magazine ah Sports catialtu a simi Bobby McMahon nih, “Messi le Ronaldo hi thim cangmi minung 10 cazin ah an i tel ko nain Virgil Van Dijk nih a hmuh telai tiah zumh a um bik,” tiah a langhter.

Messi le Ronaldo cu Ballon d’Or voi 5 veve an hmuh cang. Vawleicung Football kong a tial zungzaltu Goal Thawngzamhnak nih, “Atukum Ballon d’Or hmutu ding ah Messi le Ronaldo thotho hi dotla bik an si ko. Asinain, an ca ah apoi ngaimi cu Liverpool ah Laikham aa celhmi Virgil Van Dijk a rak um hi a si. Amah nih hin atutan cu hmuh awk aa tlak ngai ko. Asinain, Ballon d’Or hi Laikam aa celhmi pawl pek an si theng lo i Virgil Van Dijk ca ah a poi pah,” tiah a tial ve.

Ballon d’Or 2019 laksawng peknak puaipi cu September 23 ah Italy ram, Milan khua ah hlunghlai ngaiin an tuah telai, tiah theih a si.