A Fanu College Luh Khawh Nakhnga Zik a Nawhtu US Actress Thongthlak Tong




A fanu college a luh khawh nakhnga ziknawhnak a tuahtu American actress Huffman

A fanu college a luh khawh nakhnga $15,000 hmang in ziknawhnak a tuahtu American Actress Felicity Huffman cu ni 14 thongthlak ding in le suimilam 250 chung zatlang rian tuan ding in dantat a si pin ah $20,000 liam ding in dantat chap a si, tiah theih a si.

Actress Huffman fanu Sophia Macy cu college luh khawh nakhnga SAT caminpuai a phi i, a phitmi mark remhpiak ding in hringtu a nu Huffman nih William Singer timi pa cu May thla ah khan $15,000 a rak phalh.

Remhpiak chommi mark cun Macy cu Yale University, Georgetown University le Stanford University tibantuk pawl ah luhnak nawl a hmu.

Hitihin Huffman nih a rak tuahmi hi a fanute Macy zong nih a rak thei lo. Macy i a nau deuh Georgia Macy ca zong ah mark remh ding in Huffman nih William Singer cu a chim chap.

Huffman (orh) , a vapa le an fanule pahnih

Asinain, Huffman nih a fanu hniang Georgia Macy mark cu remhpiak than lo ding in William Singer cu a thlauh than.

Huffman nih, “Ka thiltuahmi cung ah zeihmanh i pheh awk ka ngei lo. Ka fanu siseh, ka vapa siseh, cun, ka chungkhar dihlak si hna seh, ngaihthiam kan hal hna. Cun, fimcawnnak ah tuanvo a ngeitu vialte cung zong ah ngaihthaim kan hal ko hna,” tiah a chim.

“Abiapi khun in college luh khawh nakhnga biatak tein aa zuammi siangngakchia vialte le fale fimthiamnak tlamtling an hmuh nakhnga harnak phun kip a tuarmi nulepa nan zapi cung ah nawlpat kan duh hna. Rak ka ngaithiam hram u,” tiah Huffman nih nawlnak a tuah chap.

-BBC