Bag Chung ah Ni 6 Bawhte Rawng in US ah Kalpi a Timtu Nu an Tlaih




Jennifer Erin Talbot

Khualtlawnnak bag chung ah ni 6 telawng a si rihmi bawhte a rawn i an ram ah tlun a timmi US rammi nu cu Philippines Airport ah palik nih an tlaih, tiah theih a si.

Hi US nu hi Jennifer Erin Talbot tiah auhmi a si i, September 4 ah khan Manila Airport ah an tlaih manh hi a si.

A bag chung i ni 6 pa bawhte cu an hmuh tik ah minu nih cun hi bawhte hi hringtu a nu hnatlaknak in US ah kalpi ka timhmi a si, tiah a ti hna.

Bawhte i hringtu nu he biakamnak an tuahmi catlap zong a hmuhsak hna. Asinain, cu catlap ah cun bawhte hringtu nu i minsen thutmi aa tel lo.

Jennifer Erin Talbot hi US ram, Utah ah a ummi a si i, atu bantuk in Airport ah ni 6 bawhte he tlaih a si caah minung cawkzuar sualtuahnak pohma in Philippines ram ah tazacuai a si, tiah theih a si.

-Hindustan Times