Barcelona in a Duh Caan ah Chuahnak Nawl Ngeih Ding Messi Nih Min a Thut




Leo Messi

Bawlungchuih caan season pakhat a dih poah ah Barcelona Team in chuahnak nawl ngei kho ding in Messi nih minsen thutnak a thar in a tuah cang, tiah theih a si.

Messia cu Barca ah 2021 tiang chuih ding in biahremnak rak tuahmi a si nain atu 2019 thawk in kum khat a tlin (Season pakhat dih) paoh ah Barca in chuah le chuah lo amah nawl a si cang lai i season pakhat hnu ah sachoh hrawhnak nawl a ngei cang.

Messi hi kum 32 a si cang ruang ah atu bantuk hin Barca nih nawl a onh hi a si lai tiah an zumh.

Aruang cu mah hlan ah Barca ah a rak chuihmi minung 3 zong kum 32 an si ah atu bantuk in Barca in chuahnak nawl pek an rak si ve.

Sihmanhsehlaw, Barca chairman Josep Maria Bartomeu nih cun, “Messi hi Barca ah caan sau deuh a um nakhnga minthut khawh ding in kan i zuam bang in amah a um lo hnu ah zeitindah Barca kan cawlcangh lai timi zong timhtuahnak kan ngei,” tiah a chim.

Messi cu naite ah tuahmi UEFA kum khat chung bawlungchuih thiam bik laksawng peknak ah hmaikal thiam bik laksawng a hmu i FIFA Ballon d’Or ca i a donghnak bik Top 3 ah Ronaldo le Virgil van Dijk he an i tel hna.

-The Union Daily