Chin Cozah Nih “Tawngzalett Times” a Chuahmi Kong ah CMN Nih Cathanh a Chuah

Chin State cozah nih “Tawngzalett Times” timi minbunh in Journal a chuah caah Chin Media hna karlak ah hninhsaihnak nganpi a chuahpi. 

Chin State cozah nih “Tawngzalett Times” a chuahmi kong he pehtlai in Chin Media Network (CMN) caan karlak tonnak February 26 ah CMN chungtel Chin Media 13 nih cathanh pakhat an chuah. 

CMN cathanh ah a tanglei konglam 7 aa tel:

“Journal chuah timi hi acozah pakhat i a ṭuanvo a si lo; cozah ngeihmi Media a um awk a si lo i cu Media cu cozah nih mipi sin thirawnhnak (၀ါဒျဖန္႔) phun khat ah a hman khawh; Chin Media hna nih thawngpang caan hmaan tein an lak khawh nakhnga le zalong tein thawngpang an lak khawh nakhnga Chin State cozah nih aa zuam deuh awk a si; Chin State cozah nih Journal a chuah tikah a dang Chin Media pawl zeirello a lo i Democracy uknak tungtlang palinak a simi Media thazaang a pe lomi a lo; Myanmar ah a ṭhangcho lo bikmi Chinram ṭhanchonak ca ah acozah nih rian a ṭuan cuahmah lio ah vuanci pumpak pakhat hruainak in Journal chuah i pumpak rian ah hman awk a si lo; Chin State cozah nih Journal a chuahmi nakin Democracy phung he i ruang in Chin Media hna nih thawngpang an lak khawh nakhnga lam a sialpiak a herh; Journal chuah timi hi acozah rian a si lo ca ah atu Chin State cozah nih a chuahmi Journal hi chuah ti lo ding in Chin Media hna nih fak piin kan duhnak kan langhter.”

A cunglei bantuk in February 26 ah tuahmi CMN tonpumhnak ah Tawngzalett Times kong he pehtlai in cathanh chuah a si. 

Chin State cozah  nih a chuahmi Tawngzalett Times kong he pethlai in cathanh a chuahtu CMN chungtel Chin Media hna cu: Khonumthung Media Group, Chin World Media, The Chin Journal, The Chinland Post, The Hakha Post, Matupi Times, Zomi Times, Falam Today, Zomi Post, Zolengthe, Tedim Post, Lairawn Post le the Chinland Herald hna hi an si.