Chin Nungak Pahnih Zong Online Mihlengtu Kut in Tangka Tam Tuk an Sung Cang

Online ah Fake Account hmang in tangka hlen timi kong hi Chinmi nih kan i ralrin ngaingai a herh cang.

Aruang cu Kawlram ah le Asia ramchung Myanmar rammi an umnak hmun pawl ah hrambunh in mi a hlengtu bu an um ti hi a hun fiang chin uahmah cang.

The Chin Journal nih kan theih tawk ah atu tiang ah Chinmi nungak pahnih hi tangka tampi hlen an tong cang. Hlen a tongmi nu pahnih chung ah pakhat cu bia zong kan rak ruah khawh.

Mihlengtu pawl hi Mirang mui a cuangmi hmanhtlak kha an Facebook ah an i tar. Asinain, an hlenthawimi hna tangka an i kuatter tikah Myanmar Bank Account an hman i Myanmar ram ah cu tangka cu an chuah.

Cucaah, hi mihlengtu pawl hi Mirang ngaingai an si maw? Asiloah, Mirang he i kom in rian a tuanmi kawl an i si maw? Cu asiloah, Kawl mihlengtu pawl nih Mirang bang in an i tuahmi a si maw? ti hi ruah awk a um.

2018 kum hramthawk lei ah khan Tahan ah a ummi Chin nungak (Educated pakhat a si) cu Mirang Facebook Account aa tlaihmi nih “Ka fa ca ah kan cawm lai. Kawlram ah ka rak tlung. Ka thilri ka rak phakter hmasa i rak ka hlampiak chung” tiah a rak ti.

Thilri hlamnak ah tangka ting tampi a hau a ti i CB Bank Account hmang in Chin nu nih cun Yangon i ramleng thilri kuatnak an timi ah tangka voi hnih hrawng a rak kuat. Asinain, zei thilri hmanh a hmuh lo pin ah tangka cu a sung dih.

The Chin Journal nih Kawlca in kan tuahmi Chin News Journal Facebook Page ah Singapore ah a ummi Chinnu nih hlen a ton venak kong a postmi cu March 8 ah khan careltu pakhat nih a run kan kuat.

Singapore Chinnu zong a cunglei Tahan Chinnu hlen a tonmi ningcang hmang in hlen a rak tong ve. A hlengtu pa Facebook Profile zoh tikah Mirang thotho a si.

Asinain, phaisa kuatnak ah Kawlram hrambunh AYA Bank Account an hmanmi hmuh khawh a si. “Hawikom tha kan si i laksawng kan kuat. Myanmar ah thil a phan, rak hlam,” tiah mihlengtu nih cun an ti.

Chinnu nih ting 15 a kuat. Asinain, a thilri zong a hmuh lo pin a kuatnak phone zong chawnh khawh a si ti lo.

Online Scam timi Online mihlenthawinak hi aluancia 1998 hrawngpi khan vawleicung ah a rak i thawk cangmi a si.

Atu tiang vawleicung tuanbia ah online in phaisa tam bik mi a hlengtu cu Infogest timi Company deu a tuahtu Maria Duval (kum 84) timi nu a si.

Maria Duval nih a hruaimi online mihlengtu bu hi vawleicung ram kip ah an i pharh. Tar le midamlo pawl an sel hna i a phunphun in an hlen hna. Kum 20 chung ah US$200 million hrawng hi vawleicung minung tampi sin in an hlen hna.

Maria Duval cu Canada rammi a si i, 2016 ah khan US Department of State nih an rak tlaih khawh. Amah he a tuantimi minung pahnih zong an tlaih khawh ve hna.

Sihmanhsehlaw, Maria Duval nih Email hmangg in online in mi a rak hlenthawi hna ningcang hi atu tiang a thi lo i a nung peng rih.

Facebook le Email hmang in kan Laimi kum 50-60 hrawng minung pawl hlenthawi an timhmi hna an tampi.

A cunglei i kan langhtermi 2018 ah a cangmi Tahan Chinnu le atu ah a cangmi Singapore Chinnu hlen an tonmi kong zoh tikah hi online mihlengtu bu nih hin (Myanmar) Chinmi asiloah tlangcungmi deuh an i sel hlahmaw ti zong ruah awk a um.

Cucaah, Email ah le Messenger ah theihlomi sin in ca a rak luh ahcun fimkhur tein tuaktaan i kan i ralrin a herh ngaingai. Abikin, naite lawng ah Social Media a hanggmi pawl nih kan i ralrin a herh khun.

Hi bantuk mihlengtu pawl hi minung pakhat lawng in a cawlcangmi an si lem lo; a bu bak in timh ciammam tein a cawlcangmi an si deuh tawn.