CNF Kong Fake News Nih Ruahchannak a Pekmi Paletwa Chinmi Hna




“Paletwa ralram Chinmi hna nih CNF cu a de ballomi Thlapa bang in an cuanh peng rih ko.”

Salai Zing Bawi|March 1, 2019| Yangon

Ka umnak Yangon khua in meng za leng a hlatmi Paletwa peng, Chin ralzam an umnak Miza khua ah ka hawipa Kawi Van he kan phaknak hi atu in cun ni 4 a si cang.

Miza ralzam camp kan phak hnu a nilinak January 10, 2019 zaanlei ah kan tlunnak Miza Baptist Pastor Aung Soe inn ah mino pakhat lau lengmang in a rung ra i, “AA nih an tlaihmi Motorcycle thilphortu minung pali an thlah than hna i atu hi khua ah an rak phan,” tiah thawng a hun kan thanh.

Ka hawipa he kan Camera le thilri pawl cu khulrang in kan i char i AA nih an thlah thanmi Chin mino pali ton awkah cun kan vung kal.

Miza khuahriang Bawm pawl an umnak ralzam camp| Photo-Salai Zing Bawi

AA nih tlaihmi chung ah aa telmi Ko Aik Htun cu a mithmai ah thinphannak le fahsaknak in a khat i kan vung phak hnu zong ah thu thiam lo dir thiam lo in aa chok i bia a kan ruah.

A ngaingai ah an pali ning tein thinphang thlalau tuk in an um hna. AA nih suimilam pahnih chung an kutleh bu le thutlo-dirlo in an umter hna i cuticun thlerhkhawn buin bia an rak hal hna.

Ko Hau Ling cu AA ralkap pa nih vawlei ah bok lak tiang in a lamh. AA pawl nih an phone an chuh dih hna hnu ah “Kan in tlaihmi hna kong Kawl ralkap sin ah le Media sin ah nan phuan ah cun kan duh caan paoh ah kan in tlaih than hna lai,” tiah an tlerh khawn hna i an thlah than hna.

AA nih an thlah thanmi Chin mino pali hna cu thlankhor in a tho thanmi bang in Miza khuami hna nih an rak veh hna i thazaang peknak bia an ruah hna.

Ko Aik Htun nih a ther cuahmahmi awaan in “A si khawh cun ralhriam i tlaih ve bak i kanmah nunhimnak i kham hi kan duh cang. Kan temh-innak a sau tuk cang. AA he kan i ton tikah Paletwa hi kanmah ram a kan ti. Kawlholh le kanmah Khumi holh in AA hmai ah kan i chawnh ahcun a kan bengh. Rakhine holh lawng nan hman lai a kan ti,” tiah lungfak ngaiin a chim.

January 11 zing, Miza khuachung| Photo-Salai Zing Bawi

January 11 zinglei ah Miza lakphak dawr ah khuami pahra hrawng an i pum i phone chung i thawngpang pakhat cu thatho ngaiin an zoh len. A phunphun in an hun i ceihcum hna.

An mithmai ka zoh hna ah ruahchannak thlaam a leng. “Zeidah cang?” tiah minung pakhat ka hal tikah a Phone chung i Screenshot cu a ka hmuhsak.

Screenshot ah Chinmi nih tuahmi Kawlholh Facebook Page (ခ်င္းေတာင္တန္းသို႔ အျမန္ျပန္လာပါ) tialmi, “CNF nih AA an kah hna. AA 90 leng an thi. CNF lei zong minung 15 hrawng hliam an pu” timi thawngpang deu (Fake News) cu ka hun hmuh.

“Ziah, thawngpang deu a si tung. Ahmaanlo” tiah chimh ka duh hna nain an mithmai ka zoh tikah ka hun i sum than.

Thawngpang deu a si ti awk an theih lo tikah Paletwa ah CNF an ra cang timi thawngpang nih ruahchannak faak tuk in a pek hna. Cu an ruahchannak cu hmakhatte ah hlolhhralpiak ding cu ka nunsia a rem ve lo.

Thawngpang deu a si tiah chim kan duh ko nain ka hawipa he zei bia chim loin cuticun kan um men.

Miza khuahriang Bawm pawl an umnak ralzam camp| Photo-Salai Zing Bawi

January 11 chun ah kan unau Laimi Bawm ralzam innchungkhar 32 an umnak Miza khuahriang ralzam camp ah ka hawipa he a donghnak bik biaruahnak vung ngeih ding in kan vung kal than.

Pu Ram inn ah kan vung lut i khua upa tampi nih a kan topi. Pu Ram nih cun meithal ser nakding ah hman a timhmi thirfung cu an tappi meicum in a hun zuh i, “Kan khuami pa vialte nih meithal ser hi kan thiam dih. Kanmah tein meithal kan i ser khawh dih. Chin ralkap nih run kan hruai hna sehlaw meithal kan i ser lai i kan i rungveng cio ko hnga,” tiah ruahchannak nganpi he a hun kan chimh.

Hika ralzam camp zong ah CNF nih AA 90 leng an thah hna timi thawngpang diklo cu an hun theih ve tikah an tha a tho ngaingai.

AA hriamtlai tihnak le Kawl ralkap tihnak karlak ah aa tenhmi Paletwa ralram Chinmi hna ca ah CNF nih a kan dirpi cang timi thawngpang cu a rak sunglawi tuk–thawngpang dik a si le si lo tu cu hei chia rih ko u sih!

Paletwa peng, Chin ralzam ngakchia hna, Pyidaung ralzam camp| Photo-Salai Zing Bawi

Kanmah tu cu CNF ralkap zong kan si lo pin ah Paletwa ralzam hna kong mizapi theih ding in a zamhtu Media raintuantu menmen kan si tikah zeiti va chimrelpi le khuakhaanpi awk kan thei hna lo.

Paletwa kan kir than hnu ah CNF nih Paletwa ah sipuazi lei tuanvo ngeitu palai ah an chiahmi Salai Kyaw Aung cu kan ton i bia kan hun ruah.

Anih tu nih cun, “CNF kan pule cu a herh caan ah cun an rak tlawng pah tawn ko. Atulio Paletwa i AA le Kawl ralkap kong bel ah cun CNF lei nih zeitin an ruah ti cu kei a chim awk ka thei lo,” tiah a chim.

Angaingai ah cun Kaladan Tiva chaklei, AA an cawlcanghnak hmunhma ah a ummi Paletwa Chinmi hna nih CNF hi an rak i bochan ngaingai.

Atu tiang zong ah Paletwa ralram Chinmi hna nih CNF cu a de ballomi Thlapa bang in an cuanh peng rih ko.

Chin ramkhel party pical pakhat i upa pakhat nih, “Paletwa Chinmi hna nih CNF an hlam tuk tikah hin CNF zong nih Paletwa ah an muihmai tal an i langh awk a si. Meithal puah a hau lo; an thilthuam tling le ralhriam tling in an muihmel tal vung i langh hna sehlaw thil sining tampi aa thleng lai,” tiah a chim ve.