Hakha-Falam kar Ramthlo pawng Kahdohnak a Ni 5nk aa Peh

Nihin July 12 zong ah Hakha le Falam karlak (Ramthlo-Dokthek karlak) ah kan miphun ralkap Chinland Joint Defense Committee (CJDC) chungtel ralkap bu hna le SAC ralhrang karlak ah kahdohnak pehzul in a um, tiah thawng kan theih.

Nihin zinglei ah kahdohnak voi khat a chuak i Falam lei in SAC ralhrang nih Ramthlo khua lei ah miakpi in kah an bawmh hna. Nihin zinglei i kahnak ah hin SAC ralhrang a tlawm bik 4 an thi lai, tiah an zumh.

Ramthlo khua milu 800 hrawng lak ah a tam u cu aluancia July 6 thawk khan ramlak himnak hmun ah an zaam dih hna.

Khua upa pakhat nih, “Nihnih chung pehzul in kan khua ah an i kap. Atu zong hi meithal thawngpang a lang in kan thieh lengmang ko. Falam lei in ralkap nih an rak kahmi miakpi nih khuachung inn pathum hrawng a hrawh a kan ti,” tiah a chim.

Nihin zaanlei zong ah Ramthlo le Dokthek karlak ah an i kap tthan i atu ca kan ttial lio tiang ah meithal thawngpang a dai rih lo.

July 8 thawk in nihin July 12 tiang, ni 5 chung Falam-Hakha karlak kahdohnak ah SAC ralhrang lei in a tlawm bik minung 30 an thi lai tiah an zumh.

Kan miphun ralkap CJDC chungtel CNA, CNDF, CDF-Hakha, CDF-Thantlang le CDF-Matupi in ralkap pakaht a nunnak a liam i a dang ralkap 10 hrawng an i hliam ve, tiah thawng kan theih.

“Pu Nei Thlau” a Hremtu Dantatnak kan Pek tiah CDF-Mara nih Thanh

CDF-Mara nih an tlaihmi Lailenpi sianginn sayagyi hremfak a tonmi kong ah CDF-Mara nih fianternak an tuah.

Local

Myanmar Junta’s Airstrike Forces more than 500 Villagers to Flee to India

All the villagers fled their homes. Most of them crossed Indo-Burma border and entered into Mizoram State.

HOME

© 2022 The Chin Journal. All Rights Reserved.

Pyidawtha, Hakha, Chin State

Designed & Developed by SalaiZB