Iraq i US Cozah Zung Riantuan Pawl US Nih Khulrang in an Ram ah a Auh Dih Hna




Iraq ram, Baghdad khua a ha ummi US Embassy

Iraq ram ah a ummi US cozah zung riantuan pawl cu US ram ah kir dih ding in US cozah nih nawl a chuah, tiah theih a si.

Iraq ram khualipi Baghdad ah a ummi US Embassy le Erbil khua ah a ummi US Consulate Zung riantuan pawl cu an ram ah khulrang in rak tlun ding US cozah nih a auh hna hi a si.

US cozah zung riantuantu dihlak ngawt in an ram ah kir ding in auh an si i, poipang thil a can sual ah khulrang in a tawlreltu ding minung tlawmpalte lawng Iraq ah an taanter hna.

Middle East ah Iran le US karlak ral lei entainak a hun linhsat tuk cang tikah Iraq ah a ummi US rammi pawl harnak an tong lai timi phan ruang ah US nih a auh dih than hna hi a si.

Middle East ah a ummi US ralkap hmunkhuarnak pawl Iran nih tuk a timh timi thawngpang a len caah Iran dohkalh ding in US timhtuahnak a ngei cuahmah.

Middle East ah US nih raldohnak tilawng le vanlawng ralkap bu a thlah cang bang in B-52 Bomber vanlawng zong a zuanter cang.

Cun, nizan nai ah khan Iran rocket bomb pawl a kapthlaktu ding ah Anti-Missal Defense System zong Middle ah US nih a hun cang.

-Press TV, Reuters