Justin Bieber Nih Avril Lavigne Le Ryan Gosling He Ciruang Lei Pehtlaihnak Kan Ngei a Ti




“Baby” hlasa Justin Bieber nih “Mission Impossible” lemcang Tom Cruise i thongh ding in a singkhaw hnu ah a Twitter cahmai hmang in Aril Lavigne le Ryan Gosling he ciruang lei in pehtlaihnak kan ngei, tiah thawng a hun thanh than.

Justin Bieber nih ciruang lei in kan i pehtlai, ka chungkhar an si tiah Twitter ah thawng a thanhmi kong ah Canadian hlasa Avril Lavigne le Hollywood star Ryan Gosling nih zei cu an let rih lo i, kan naupa/kan tapa ti zong in an hei hlam ve rih lo.

Atu ah kum 25 a hun si ve cangmi Justin Bieber nih, “Online i Ancestry.com ti hmang in hlanlio ka pupa hna le thisa lei in pehtlaihnak a ngeimi ka chungkhar pawl ka kawl hna. Cu chung ah Avril Lavigne le Ryan Gosling he pehtlaihnak kan ngeihmi ka hmuh. Ka nunnak ah kaa nuamh bik caan a si ve. Ancestry.com ah a ummi hi adikhmaan bak ko lai,” tiah Twitter ah a tial i Family Tree screenshot a tuahmi zong a tar chih.

Ancestry.com hi a ngaingai ah atulio vawleicung online ah tuanbia le thawhkehnak lei record tha tein a fim kho biktu a si i mi tampi nih an zumh ngaimi a si ve.

Avril Lavigne le Ryan Gosling he pehtlaihnak kan ngei, chungkhar kan si tiah Justine Bieber nih a timi kong ah a Manager pa zong nih, “An i lo tuk hna ka rak ti khe eh” tiah a lung a tlinpi ve.

-The News International