Khrihfa Nute Islam Biaknak an Luhter Hnu ah Muslim Pa an Vatter




Pakistan ram, Karachi khua ah kum 15 lawng a si rihmi Khrihfa tleirawl nute Nayhar cu Islam biaknak ah an luhter hnu ah kum 45 a simi Muslim pa an vatter, tiah theih a si.

An vattermi Muslim pa hi nupi le fa pathum a ngei cangmi a si. Nayhar cu tlaihrem a ton pin biaknak i thlen ding in an tlerhkhawnnak ah tukvelh zong a tong.

“Islam biaknak na pom lo ahcun na tapa hi inncung in kan thlak lai” tiah an tlerhkhawn ruang ah Islam biaknak ah a lut i kum 45 a simi Muslim pa cu a vat.

Sihmanhsehlaw, caan tlawmpal a rauh hnu ah a vatmi Muslim pa i a fanule nih an bawmh i an zaamter.

A vapa theihternak tuah lo le lungtlinnak tel loin a vapa inn in a zaam caah Islam phung na puar tiah sual an phawt.

Asinain, Karachi ah a ummi Khrihfabu nih Nayhar cu an kilkamh ve cang. Khrihfabu bawmhnak in May 13 ah khan kum 45 a simi Muslim pa cu palik zung ah report an tuah.

Palik zong nih cu case cu an cohlan i kumtlinglo (kum 18 tang) hramhram in nupi ah tuanternak case in Muslim pa cu tazacuai a si lai, tiah theih a si.

-MCN