Matupi ah Zung Pahnih Sak Nakding Budget Ramkomh Cozah Sin ah a Ap Than

Matupi District zung sak nakding hmunhma chung ah sak ve an timhmi zung pahnih sak nakding Budget cu ramkomh cozah sin ah an ap than, tiah theih a si.

Matupi in meng 7 hrawng a hlatnak hmun Phanaing le Ngalaing khuate karlak ah Matupi District zung sak ding in timhtuah a si i cuka hmun ah cun palik zung le saknak lei zung sak ve ding in timhtuah chih a si.

Asinain, atukum January le April ah Matupi District zung saknak hmunhma kong ah a duhlotu pawl nih lamzawhnak voi hnih an tuah i rian an domh kho lo.

Cucaah, Budget a tla cangmi a si nain palik zung le saknak zung cu atu tiang an sak khawh lo caah Budget cu ramkomh cozah sin ah ap than a si, tiah vuanci U Soe Htet nih a chim.

Lamzawhnak voi hnih tiang a chuah tikah Matupi district zung cu atu tiang an sa kho lo. Atu in thla 4 lawnglawng hi saknak caan a taang cang.

Pumpak company pawl nih thla 4 chung ah cun an lim khawh lai lo caah saknak lei zung tu nih Matupi District zung saknak tuanvo cu a lak cang lai.

Mipi nih an dohdal len ve ko nain Matupi district zung cu ahlan i an rak khiah ning tein Phanaing le Ngalaing khuate karlak acre 180 a kauhnak hmun ah sak a si lai, tiah theih a si.

-Chin World