Minthang BLACKPINK Hla Ban a Tong




Blackpink K-Pop Group

April 2019 thawk in vawleipi a cultu K-Pop Blackpink hlasabu nih an sakmi “Kill This Love” timi hla cu rauh lo piin ban a tong, tiah theih a si.

Korea ramchung i minthang bik TV Channel pakhat a si vemi KBS nih “Kill This Love” timi hla an Channel ah chuah hrimhrim lo dingin August 29 thawk khan a ban.

Atu bantuk in KBS nih “Kill This Love” hla a bannak aruang cu an hla video chung ah Rose nih motor a mongh lio ah khan Seat-belt aa hruk lo caah a si.

Rose nih Seat-belt i hruk loin motor a monghnak part aa tel ruang ah Korea ram i Road Traffic Act an buar tiah KBS tuanvo ngeitu nih a chim.

Cu lawng si loin KBS nih “Kill This Love” timi a bannak aruang dang pakhat a um rih.

“Kill This Love” timi an hla Album Photo Cards ah Blackpink chungtel nu pali an hmai cung ah khawndennak hmaneh pawl an um. Cucaah, “Hi Album nih hin taksa lei tukvelh khawndennak hi a cawisan i a thangthatmi a lo,” tiah KBS nih an ti.

An Album ah an telhmi a cunglei hmanthlak kong ah hin Blankpink Fan pawl zong nih a phunphun in an ceihcum ngai ve.

April thlathawh ah an thlahmi “Kill This Love” cu atu tiang ah a zohtu milu 100 million leng an si manh i Youtube tuanbia ah caan tawite chung ah minung tam bik nih an zohmi hla ah aa chuah.

-SCMP