UN nih Myanmar ram special palai ah a hmanmi Noeleen Heyzer le SAC ralhrang bawizik Min Aung Hlaing cu nizaan August 17 ah hmaitonh biaruahnak an ngei i, Myanmar ram mipi inn duah le vanlawng bomb thlak ngol ding in Noeleen Heyzer nih Min Aung Hlaing a chimh, tiah UN Myanmar nih thawngpang an chuahmi ah an telh chih.
“UN Security Council nih a donghnak bik halnak a tuahmi hranhramnak vialte ngol dih ding, nuhrin covo cung ah upatnak ngeih ding, Myanmar ramchung upadi lenter ding le bawmh a herhmi mipi sin ah him tein bawmhnak phakter ding timi pawl kha Noeleen Heyzer nih a chim nolh tthan. Cun, Myanmar mipi umnak hmun ah vanlawng bomb thlak le mipi in duah pawl ngol ding in a chim pin ah Myanmar ramchung buainak zorter zawkzawk ding ah tuah a herhmi step pawl a chimh,” tiah UN Myanmar nih a langhter.
Atutan Myanmar ram ah UN palai pumpak in a ratnak aruang bik cu Myanmar ramchung buainak le mipi temhtuarnak dihdonghter ding in ceihmainak a rak ngeihmi a si, tiah an langhter chap.
Atu bantuk in UN nih Min Aung Hlaing he pehtlaihnak a ngeihmi hi SAC hi Myanmar ram phungning cozah a si, tiah a cohlan caah a si hrimhrim lo, tiah UN cathanh ah an langhter.
