Ralzam Pawl Porter an Phorhter Hna Si Lo; Ralkap an Bawmh Hna Bia a Si Tiah Miza Khuauk Nih Chim

Chin ramkulh, Paletwa peng, Miza khua pawng ah a ummi Chin ralzam pawl cu ralkap nih porter an phorhter hna si loin anmah tu nih ralkap an bawmh hna bia a si, tiah Miza khua uktu nih a chim.

“Porter phorh ding in an fial hna lo. Hitihin a si. Anmah ralzam tu nih an bawmh hna. Uh-Ta-Lin Chawng le Kha-Maung-Wa lei ah ralkap tirawl an phorhpiak hna. Atu bantuk in ralzam hna nih ralkap bawmhnak an pek hi thla 2 chung hrawng a si cang. Bawmhnak pek khi a si ko. Ralkap lei nih minung pakhat ah Ks. 4,000 an phalh ve hna,” tiah Miza khua uktu U Hoih Law nih The Chin Journal ah a chim.

Voi 10 hrawng ralkap porter a phor cangmi ralzam Pa Lal nih, “Atu hin cun porter kan phorhnak hi thla 2-3 chung a si cang. Zarh khat ah voi hnih hrawng kan phor. Pa pawl kan kal khawh lo cun nu pawl zong an kal. Nihin cu Miza khuami pawl porter an phor tiah kan theih. Thaizing hi kanmah zong kan phor ve men lai dah,” tiah a chim ve.

Ralkap tirawl facang le pe pawl cu Hta-ru-aing timi khua in Miza khua tiang tilawng in an phorh. Cu dih cun, Miza in meng 7 hrawng a hlatnak Kha-Maung-Wa ah ralzam pawl nih keeng in an phorh.

“Minung pakhat Ks. 4,000 cio cu a kan phalh ko. Porter phorh ah a kal lomi cu khua uktu lei nih Ks. 4,000 nan liam lai a kan ti. Cucaah, kan duh lo zong ah zeiti awk a tha lo, kan kal a hau ko,” tiah Kawi Lal nih a chim chap.

2016 ah a cangmi AA le Kawl ralkap kahdohnak ruang ah Bangladesh-Myanmar ramri ah khua a sami Pyidaung le Kungpyin khuami hna cu an khua ningpi in an zaam i Miza khua pawng i ralzam camp pahnih ah eidin tirawl lei harsa ngaiin khua an sa hna.