Ronaldo: Messi He Kan i Pehtlaih Ning a Tha Ko, Hmun Khat Belte ah Kan Eiding Ti Rih Lo




UEFA Player of the Year 2019 laksawng peknak puai Messi le Ronaldo

Europe kum khat chung bawlungchuih thiam bikbik pawl laksawng peknak (UEFA Player of the Year 2019) an tuah lio ah Messi, Ronaldo le Virgil Van Dijk cu aa thlang in hmaisuang ah an thu hna.

A thaim bik laksawng pek lai ah an pathum in nu pakhat nih bia a hal cio hna. Cu biahalnak ah cun Ronaldo nih Messi he an i pehtlaih ning a tluan kong le atu bantuk in vawleicung bawlung tuanbia hraap khat aa tel khawh ruang ah a lunglawmhnak kong a langhter.

Ronaldo nih, “Messi he atu bantuk laksawng peknak puai ah hin aluancia kum 15 in kan i tong zungzal cang. Atu bantuk thil sining vawleicung bawlung tuanbia ah a um ti hnga maw ka ti–a zungzal in kan pahnih peng atu bantuk in i ton hi a fawi ve hrimhrim ve lo. Kan pahnih karlak ah a thami le a tluangmi pehtlaihnak kan ngei ko. Zaanriah belte hmun khat ah kan dum ti bal rih lo, hmailei ah a si kho telai tiah kaa ruahchan,” tiah a chim.

Ronaldo nih lungthiang tein “Zaanriah belte kan dum ti bal rih lo” tiah a vun chim lio ah mizapi lunghmui in an ni i, zapei an beng.

“Spain ah ka rak chuih lio kha ka ngai tuk ko. Messi he kum 15 chung bak kan i zuam cang. Cucu thiltha ngai a si ko. Bawlung tual chung kan i ton zong ah ka en, a ka en ve ko. Cucaah, vawleicung bawlung tuanbia hraap khat ah atu bantuk in kaa tel hi a tha ngai tiah ka ruah ko. Atu ah hikahin kei ka um bang in Messi zong a um ve,” tiah a chim.

September 23 ah Italy ram, Milan khua ah tuah dingmi FIFA Ballon d’Or 2019 laksawng peknak zong ah Messi le Ronaldo an i tong thotho lai. Ballon d’Or 2019 Top 10 cazin chung ah Messi le Ronaldo hi an i tel thotho.

FIFA Ballon d’Or 2019 Top 10 ah aa telmi hna ahote dah an si timi le aho nih dah a co lai tiah an zumh bik timi theihhgalh ve na duh ahcun hika LINK hi hmet law Laica in rel ve.