SAC ralhrang nih thihdan an pekmi hna NLD palai U Phyo Zayar Thaw, Democracy Activist Ko Jimmy, Hla Myo Aung le Aung Thura Zaw cu upadi ning in dan kan tat cang hna, tiah nihin July 25 ah thawngzamhnak an tuah.
Hla Kyo Aung le Aung Thura Zaw hi SAC ralhrang thawngpetu (Dalan) thah ruang ah Yangon ah an rak tlaihmi hna an si.
July 22 ah khan an chungkhar pawl cu SAC ralhrang nih tonnak nawl an pek hna. Hmaitonh ngaingai in ton si loin Zoom video in biaruahnak in an tonter hna.
Chungkhar an tonter hna hnu July 23 ah SAC ralhrang nih an pali ning in an thah hna, tiah Myanmar Now le Khit Thit Media nih an ttial.
Asinain, atu tiang ah hriawhnak in maw an thah hna, asiloah, meithal in dah an kah hna timi fiang in theih a si lo.
SAC nih nihin zinglei ah thawngzamhnak an tuah hnu in chungkhar hna nih an sining hlat awk ah le an ruak hlam awk ah Insein thonginn ah an kal i atu tiang ah cun an ruak an pe duh hna lo, tiah Myanmar ramchung thawngzamhnak pawl nih an ttial.
