Sung Tin Par Nih Hla Thar Fung 2 aa Khumh Cuahmah Lio




Sung Tin Par le Sanpi | Photo- Sung Tin's Timeline

Myanmar ram hlasa minthang bikbik lak ah aa telmi Sung Tin Par nih hla thar pahnih aa khumh cuahmah tiah theih a si.

Atutan aa khumhmi hla thar pahnih hi Myanmar hlaphan thiam minthang a simi Sanpi nih a tialmi an si.

Sung Tin nih, “Hlaphan thiam Sanpi tialmi hla fung hnih kaa khumh. Amah nih Harmony a ka sakpi caah ka lawm tuk hringhran. Doran Band nih a kan tumpiakmi cung zong ah ka lawm,” tiah a tial.

Doran Band zong hi Yangon ah hram a bunhmi Chinmi Music Band pakhat a si i, Myanmar ram ah hmunhma a hun ngei chin tluahmah ve.

Atu Sung Tin nih aa khumh cuahmahmi hla cu a rauh hlan ah a chuak colh lai tiah theih a si nain a nicaan bel a fiang rih lo.