Thantlang Peng Chung Siangngakcia Pawl Caminpuai an Lim Cang

Thantlang peng, CNA le CDF nih an humhakmi hmunram ah ca a cawngmi siangngakchia hna caminpuai cu July 25 in 27 tiang an tuah i, tlamtling tein an lim cang, tiah thawngpang kan theih.

Thantlang peng caankarlak fimcawnnak department hruainak in tuahmi caminpuai a si i, SAC ralhrang nih uknak an chuh ruang ah fimnak tlamtling in a cawng kho lomi siangngakchia pawl kha thla 6 cu ca an chimh hna hnu ah atu ah caminpuai an tuah hi a si, tiah Thantlang peng caankarlak fimcawnnak zung luzik Salai Cross Thang nih a chim.

“Ralkap nih uknak an lak ruang fimnak tlamtling in a cawng kho lomi siangngakchia pawl kha thla 6 chung ca kan chimh hna i, atu ah caminpuai kan tuah hi a si. Ahlan i tang 1 a simi kha atu caminpuai an awn cun tang 2 ah kaiter an si lai,” tiah a chim.

Tukum September thla in caankarlak fimcawnnak kumthar thawk a si tthan lai i May 2023 tiang, thla 9 chung cacawn a si lai.

“Atu kum September thla in cacawnnak thar kan thawk tthan lai. Hmaikum May thla tiang, thla 9 chung a si lai. Siangngakchia hna ca ah cauk (Textbook) tibantuk belte hi kan chambau ngai,” tiah a chim chap.

Sianginn cachimtu saya/sayamate hi CDM a tuahmi hna le volunteer in a pum aa pemi mino hna an si. Thantlang peng caankarlak fimcawnnak zung lei nih cun lahkhah pek tibantuk in an bawm kho hna lo nain mahle khua i nulepa/bu hna nih an ti khawh tawk cio in akenkip in an bawmh ve hna.

NUG zong nih siangngakchia 50 ah 150,000 MMK rate in voi khat bawmhnak a rak pek hna.

Atutan Thantlang peng chung caminpuai a phimi siangngakchia hi 7,000 hrawng an si i, cu chung ah cun ralhrial (IDP) siangngakchia 3,000 hrawng an i tel hna, tiah Salai Cross Thang nih a chim.

A Fale 2 a Thah hna Hnu ah an Ruh Suitcase Chung ah a Rawn Hna

A fale pahnih a thah hna hnu ah an ruhro pawl Suitcase chung ah a rawngtu South Korea nu an tlaih.

Crime, International

Myanmar Junta’s Airstrike Forces more than 500 Villagers to Flee to India

All the villagers fled their homes. Most of them crossed Indo-Burma border and entered into Mizoram State.

HOME

© 2022 The Chin Journal. All Rights Reserved.

Pyidawtha, Hakha, Chin State

Designed & Developed by SalaiZB