Thlakhat Leng a Tlaumi Van Uk Cung a Nehnang Atu Tiang an Hmu Lo

Hakha peng, Zokhua (B) ah khua ah khua a sami tlangval Van Uk Cung cu April 1 in leng a chuahnak in atu ni tiang inn a hlam ti lo caah chungkhar an lungre a thei.

Van Uk Cung cu Zokhua (B) Primary sianginn ah sayagyi a tuanmi Pu Nawl Uk le Pi Ni Iang hna i a fapa pahnihnak a si i fale pali lak ah amah lawng hi pate a si.

April 1 ah khan Zokhua he meng 15 hrawng a hlatnak Ruadeu khua ah thit-um puai zawh ding in ka kal lai tiah a chimh hna. Asinain, khuami hna nih kan khua ah a rak phan lo tiah an chim.

A pa zong nih pumpak in Ruadeu khua ah a vung kal i kawlhawlnak a tuah. Ruadeu khuami nih an Van Uk Cung hi an theih tukmi a si ko nain an khua thit-um puai zong ah an hmu lo.

Van Uk Cung a nu Pi Ni Iang nih, “Mah hlan ah khan Singapore ah kal ka duh a ti. Kanmah zong nih kan in kalter ko lai tiah kan ti. Chungkhar zong ah buaibainak a um lo,” tiah a chim.

Van Uk Cung a tlaunak kong cu Hakha hrambunh thawngzamhnak pakhat lawng ah thawngthanhnak an rak tuah i palik sin belte ah report an rak pe lo.

A nu nih a chim ning ah a hmanmi FB Account zong a chel ah cun a online tawn nain a tlau than lengmang. Kaa khatkhat a phak hmanh ah pehtlaihnak a kan tuah awk a si, chungkhar kan lungre a thei ko, tiah a chim.