Twitter Nih a Thahpiakmi SG Min Aung Hlaing Account a Si Lo: Ralkap




May 14 ah Twitter nih a thahmi Senor General Min Aung Hlaing Account cu amah nih a hman ngaingaimi Account a si lo, tiah ralkap chimnak nawlngei Brig. Gen. Zaw Min Tun nih a chim.

“Media cheukhat ah an langhtermi SG Min Aung Hlaing Twitter Account an thahpiak timi hi amah Account a si lo. SG Min Aung Hlaing nih Twitter ah Account a ngei lo. Thahpiak a tongmi Account hi aho ta a si kan thei lo,” tiah a chim chap.

SG Min Aung Hlaing min in Twitter ah a ummi Account an deletemi kong he pehtlai in Twitter nih phungning in thawngthanhnak le fianternak zong a tuah ve lo.

Facebook nih August 2018 ah SG Min Aung Hlaing Page le Kawl ralkap he aa pehtlaimi Page vialte a rak thah dih.

Cu hnu ah Russia Social Platform pakhat a simi VK ah SG Min Aung Hlaing Account thar an rak ser.

Asinain, a ruah hlan ah VK zong nih SG Min Aung Hlaing Account cu a thahpiak ve.  Sihmanhsehlaw, VK ah sermi le Twitter ah an sermi SG Min Aung Hlaing Account pahnih hi amah SG Min Aung Hlaing nih a hmanmi an si lo, midang nih a sermi an si lai, tiah ralkap lei nih an langhter.

-Irrawaddy