Russia nih Ukraine a tukmi kong he pehtlai in United Nation General Assembly (UNGA) lakhruak tonpumhnak cu February 28 in an thawk i, “Ukraine mipi lei ah Myanmar kan ttang,” tiah UN ah Myanmar aiawhtu palai a simi U Kyaw Moe Tun nih a chim.
SAC nih Myanmar ram uknak an chuh hnu ah UN nih SAC palai a cohlang hna lo. Ahlan i a rak ttuan tthingmi (Myanmar mipi lei a dirmi) U Kyaw Moe Tun tu hi Myanmar aiawhtu palai ah an cohlanmi a si.
Ukraine kong he pehtlai in United Nation Security Council (UNSC) nih lakhruak tonpumhnak a tuah nain Russia mawhphorh ding timi biatung cu amah Russia lila nih Veto Power nih a hnon caah UNGA lakhruak meeting an auh tthan.
UNGA ah Veto Power a ngeimi zei bantuk ram hmanh nih an Veto Power hman a ngah lo.
“Russia nih ral lei in Ukraine a luh hnawhmi kan cohlang lo, Russia ralkap pawl Ukraine in kirter dih i kahdohnak ngol ding,” timi biatung cu UNGA ah an chuahpi i, vote thlaknak an tuah.
Vote thlaknak an tuah lai biachimnak ah Myanmar aiawh U Kyaw Moe Tun nih, “Ukraine nih an temtuarmi nganfahnak hi Myanmar mipi nih kan tuarpi thiam khun hna. Aruang cu kanmah lila zong ralkap kut in fak tuk in kan tuar ve…Cucaah, Ukraine mipi lei ah Myanmar kan dir i, atutan biatung chuahpimi zong hi kan cohlan,” tiah a chim.
Cu lawng si loin Russia nih Ukraine a luh hnawhmi hi cohlang awk hrimhriam a ttha lo i, arianrannak in ngol ding in U Kyaw Moe Tun nih a chim chap.
March 2 ah tuahmi Russia le Ukraine kong vote thlaknak ah vawleicung ram 180 nih vote an thlak.
Myanmar telh in ram 141 nih biatung an chuahpimi an cohlan caah cu biatung cu fehter a si.
Russia, North Korea, Syria, Belarus le Eritrea nih kan cohlang lo tiah Russia lei ttang in vote an thlak.
Cun, China, India, Iraq, Iran le Pakistan telh in ram 34 nih vote thlak lo (Neutral) in an um hna.
Russia le Ukraine kong ah UNGA nih a fehtermi atutan biachahnak hi zulh hrimhrim ding timi cu a si lo; asinain, Russia nih Ukraine a luh hnawhmi hi vawleipi nih a cohlang lo timi a langhtertu a si caah hmual a ngeih ngaingai. Cu lawng si loin vawleicung zatlangpi in Russia pheu a tong timi a langhter caah Russia ca ah a fah khunnak a si.
