Russia nih Europe nichuahlei ah a ummi Ukraine ram a luh hnawh hnu in US nih Ukraine innpa ram pawl sin ah ralkap thazaang le ralhriam a hun chap thluahmah ve.
US President Joe Biden nih, “NATO hmunram cu lehmah pakhat zong luat loin US nih kan runven lai,” tiah Russia nih Ukraine a luh hnawh hnu ah a chim.
North Atlantic Treaty Organization (NATO) ah US telh in chungtel ram 30 an i tel hna.
Ramdang ral nih NATO chungtel ram pakhatkhat a tuk ahcun kan i bawm lai, tiah runvennak lei ttanrual ding in hnatlaknak a ngeimi ram an si hna.
Romania, Poland, Slovakia, Hungary, Lithuania, Latvia le Estonia hi atulio Russia nih a tukmi Ukraine he innpa ram pawl an si caah Russia ral in ven ding in US nih a ralkap le a ralhriam pawl a hun kuat thluahmah hi a si.
Abikin Poland ah US nih ralkap le ralhriam a kuat. Nizaan nai khan ralkap 500 le Van ral runvennak Patriot’s Missile System pahnih a kuat.
Germany zong ah US ralkap thar kuat chap ding in timhtuah a si. Europe ah a ummi US ralkap thazaang hi 100,000 an phan cang lai, tiah CNN zong nih March 9 ah a ttial.
Poland ah hin US ralkap 4,000 an rak um cang i atu ah a thar in ralkap 3,000 kuat chap a timh. 3,000 chung ah 500 hrawng cu Poland ah an phan cang.
NATO Secretary General Jens Stoltenberg zong nih, “NATO raldohnak vanlawng 130 hi atu ah ready in kan umter hna. Cun, Mediterranean Rili ah ralkap tilawng 200 leng kan chiah i hmun kip ah ralkap a thongthong in ready in kan umter ko hna,” tiah a chim.
Russia nih Ukraine a luh hnawhnak zarh hnih fai a hun si cang. Russia bomb thlaknak ruang ah Ukraine rammi 450 hrawng an nunak a liam cang i, ngakchia 41 zong an i tel. Hliamhma a pumi rammi sawhsawh 1,000 leng an phan.
Ukraine rilikam khuapi a simi Kherson khua cu Russia nih a lak cang i a dang khua pawl lak ding in hmai an nor cuahmah.
Ukraine raldoh bawmh ding in vawleicung ram 50 in pum aa pemi minung 30,000 leng zong Ukraine ah an phan ve.
March 10 tiang ah Russia ralkap a thimi hi 6,000 cu an tling lai, tiah CBS nih a ttial. Cun, Ukraine raldohnak ah Russia ralbawi (Commander) pakua a thi fawn cang, tiah Daily Mail le The Mirror nih an ttial ve.
Ukraine ramchung khua tampi ah kahdohnak a um caah innpa ram ah a zaammi Ukraine rammi hi 2.5 million (2,500,000) hrawng an phan cang, tiah NBC nih March 11 zinglei ah a chim.
Aruang um loin Russia nih Ukraine a tuk caah vawleicung ram kip thin a phawh i sipuazi dantatnak fak tuk in an tuah.
Facebook, Twitter, Tiktok tibantuk vawleicung social platform ngan bikbik pawl nih Russia ram ah an Platform hman khawh lo ding in an thah viar.
Cu lawng si loin vawleipi cul in kan hmanmi Master Card zong Russia rammi pawl nih an hmang kho ti lo, thahpiak viar an si.
Russia ramchung ah Branch 800 leng a ngeimi MacDonald zong nih a dawr a khar dih.
A fak khunmi cu Russia Central Bank dantat aa huah pin ah US le Europe ram pawl nih Russia zinan le gas lak ti lo ding in an phih dihmi hi a si.
Russia tangka man fak tuk in a ttum colh. Russia tangka fang khat nakin US Dollar pia khat (cent) a man sang deuh cang.
Nitlaklei ram nih Russia cung ah sipuazi dantatnak fak taktak in an tuah bang in Ukraine kiangkap ah a ummi NATO chungtel ram pawl runven ding in ral lei zong in timhtuahnak an ngeih cuahmah.
Russia nih a tukmi Ukraine ram belte hi NATO chungtel ram a si lo tik ah ral lei in NATO nih bawmh awk a ttha lo.
Asinain, US, Germany, UK, Greece, French, Belgium, Canada, Czech Republic, Portugal, Romania, Spain, Sweden le Netherlands nih ralhraim le chawva lei in Ukraine hi pehzul in bawmhnak an pek cuahmah ve.
