Zuamcawhnak in a Khatmi US Boxing Ring ah Chinpa Nih Keethlak Hram a Thawk




Vawleicung boxing thongh minthang tampi an chuahnak US ram Boxing tual ah Chin tlangval Ring Bawi (kum 21) nih keethlak hram a hun thawk ve cang, tiah thawng kan theih.

Atuku February thla thawk khan Ring Bawi cu Indiana Boxing Grappling bu ah cawnnak tuah hram a thawk i Boxing zong voi hnih aa thong ve cang.

Ring Bawi nih, “TV ah a rami Boxing thongh zohnak in Boxing hi ka rak duh. 2018 ah khan Boxing Club pakhat ah luh ka tim nain a man a fak tuk i ka lut kho lo. Asinain, atukum February ah khan atu ka cawnnak nih Free in an ka auh,” tiah Chin News Journal sin ah a chim.

Boxing thong a cawn zarh thum telawng a si ah Ring Bawi cu Indiana USA Amateur Boxing puai ah an thonghter. Hmuhtonnak zong a ngeih rih lo caah Judge te biachahnak (Split Decision) in a sung.

Ring Bawi

Asinain, April thla ah khan Indiana Junior Olympic ah Welterweight khing ah aa thong i teinak a hun hmu.

“May 18 khi i thongh ding in a ka cawnpiaktu Coach Patrick nih a ka chimh nain atu hi khual a tlawn lio a si i a fiang ngaingai rih lo,” tiah Ring Bawi nih a chim chap.

Boxing vawlei ah kee a thlatu paoh nih cun Professional si hi duh dih a si. Kei zong Pro si ding in ruahchannak ka ngei i caan saupi kaa zuam a hau ve rih lai. Atukum chung ah fak piin kaa zuam lai Nation Level ah i thong kho ding in kaa tim, tiah a saduhthah le a timhlamhnak a langhter chap.

Ring Bawi cu Thangtlang peng, Zephai khuami a si i, 2010 ah US ram ah a phan. Unau panga chuak an si i a nulepa le a unaule cu Laitlang ah an um hna, tiah theih a si.